An Open Letter To An Ex...

AN OPEN LETTER TO AN EX...

Wala namang gustong mapalitan sa buhay ng taong mahal natin, di ba? Pero minsan kailangan nating tanggapin ang malungkot na katotohanan na kung anuman ang meron tayo, nakalipas na yun. Isang ala-ala na lamang. Na sa oras na ito mismo, posibleng may iba nang nagpapatibok ng puso mo, na may iba nang dahilan ng pag ikot ng mundo mo.

Swerte mo kasi ambilis mong nakalimot. Hindi man naging maganda ang katapusan natin, sa totoo lang – medyo mapait pa nga e pero hindi nangangahulugan na may galit akong nararamdaman sa yo. Sa katunayan, natutuwa ako na wala ka nang nararamdang sakit o hinagpis. Isa lang ang pakiusap ko, alagaan mong mabuti ang sarili mo.

Sana yung susunod na iibigin mo, maintindihan nya na hindi ka makwento – hindi ka madaldal. Di ba “man of few words” ka nga. Yun ang pinaka deskripsyon ko sa iyo. Sana maintindihan nya na madalas gusto mo ng tahimik, nang mag isa ka lang kasi sa ganoong paraan ka nakakapag isip. Sana maintindihan nya na mas gusto mong malapit sa kalikasan. Yung walang ingay ng siyudad, yung tipong nakapaa ka lang kahit na mamasa masa ang damo dahil sa hamog. Yung mga ganung bagay ang nagpapasaya sa iyo. At sana malaman nya din na sa simula hindi ka talaga nagtitiwala agad pero sa sandaling magmahal ka na, totoo yun. Tapat yun. Sana malaman din nya na ang paraan para makapasok siya sa buhay mo ay yung mahalin ka nya ng walang pag-aalinlangan, nang walang pagdududa, na aalagan ka nya at iisipin ka nya sa bawat desisyon nya. Sabi mo nga – loving someone new gives you an opportunity to prove who you really are and that person to accept you wholeheartedly.

Sana maintindihan din ng bago mong mamahalin na maraming bagay tungkol sa iyo ang hindi nya maiintindihan pero sana malaman din nya na hindi naman lahat kailangan nyang intindihin, ang kailangan lang nya ay ang magtiwala at tanggapin ka ng walang pag-aalinlangan. Hindi mahalaga kung hindi nya maintindihan ang hilig mo sa Clash of Kings at Invasion. Hindi din nya kailangang tanungin kung bakit ang paborito mong TV series ay It’s Always Sunny in Philadelphia at kung bakit addict ka sa Game of Thrones. Hindi rin nya kailangang maintindihan ang ginagawa mo at kung bakit mo kinakailangang mag-aral ng permaculturing. Hindi rin nya kailangang intindihin kung ano ang taste mo sa musika. Na ang gusto mo yung mga old school songs kasi old soul ka naman talaga e. Sana rin maintindihan nya na hindi nya kailangang gustuhin lahat ng gusto mo. Sapat na nandiyan lang siya sa tabi mo at nakasuporta sa lahat ng gagawin mo.

Alam naman natin na hindi ka perpekto. Na may mga araw na may sumpong ka, na madaling mairita. Sana habaan nya lang yung pasensya niya. Na sana maging mapagkumbaba sya. Sa tingin ko yun ang nawala sa atin kasi masyado tayong naging ma pride. Sana maintindihan din nya na kapag may sinabi ka, ginagawa mo yun at sana hindi niya pagdudahan ang pagmamahal na kaya mong ibigay. Sabihin mo sa kanya na dapat panghawakan niya yun ng buong-puso. Kasi isa yun sa mga dahilan kung bakit talaga kita minahal.

Gusto ko ding sabihin na nuong minahal kita, binigyan mo ko ng kaligayahan na hindi matutumbasan ng kahit na anong materyal na bagay. At ang hiling ko lang sa ngayon ay maging masaya ka kabilang man ako o hindi sa buhay na pinili mo. Salamat dahil tinuruan mo ako kung paanong magmahal ng higit sa sarili. Yung pagmamahal na walang kondisyon. Yung pagmamahal na totoo at kaya ko palang ibigay sa ibang tao. Marami pa akong ipinagpapasalamat sa iyo pero higit duon, salamat at naging parte ka ng buhay ko.

Time heals all wounds and someday I hope to see you again and by that time I hope I can face the man who broke my heart so bad because I am whole again.