Ang Tulang Walang Pamagat

ANG TULANG WALANG PAMAGAT

Isang panahon sa buhay ko nang ikaw ay dumating

Masasayang sandali aking nadama sa iyong piling

Kay daming alaala na ikaw ay kasama

Ngunit ngayon nga ba ay talagang wala na?

Sa isip at puso ako’y patuloy na umaasa

Na ang pag-ibig natin ay hindi pansamantala

Alam ko sa puso kong ako’y tunay mong minahal

Ngunit ikaw ay nalunod at ika’y nasakal

Aaminin kong ako ay tunay na nagsisisi

Na ako ay nawalay sa iyong pagkandili

Hiling ko sa Diyos na sana ako’y di pa huli

Upang ipadama ang pag-ibig sa araw at gabi

Kung alam mo lamang nasa puso at dibdib

Ito’y pagsintang sadyang kay ribdib

Sarili ay babaguhin kung iyon ang paraan

Upang pagmamahal mo ay muling makamtan

Lahat ng nais mo ay aking gagawin

Sa lahat ng bagay ikaw ay susundin

Ano pa ba ang kailangan kong gawin

Upang ang pag ibig ko ay huwag limutin

Ang hiling mong di pakikipagusap

Ito nga naman ay sadyang kay hirap

Nadarama ko ngayon ay kasiyahang huwad

Sapagkat di ko kalikop ang iyong palad

Ang nais ko lamang sana ay maayos muli

Itong relasyon wag sanang sa paghihiwalay mauwi

Hindi ko kakayanin kung lumisan ka ng tuluyan

Sapagkat ikaw lamang ang nais ng pusong uwian

Ngunit kung ang lahat ay sadyang tapos na

Sabihin na lamang ng ako’y di na umasa

Kahit katumbas nito ay ang pangungulila

Pipilitin kong limutin ka sinta

Kung sadyang paalam ang syang hahantungan

Ako ay may hiling na sa puso mo at isipan

Alalahanin mo lamang masasayang sandali

At laging tandaan na sa puso ko ikaw ay natatangi